العلاقات العامة(Public Relations (PR

عملاق التسويق والدعاية الجديد ، واللى غيّر مفاهيم التسويق العتيقة ، و جه بكلام جديد بيقوله للشركات الصغيرة ، والناس اللى كانت مصرّة زمان على ان التسويق الناجح عاوز فلوس كتير.

العلاقات العامة فى الدعاية ببساطة هي خلق علاقات قوية ومتميزة مع الجمهور ، بهدف الحصول على الشعبية للمنتج و بناء العلامة التجارية ، أو بهدف سد أى ثغرات وإشاعات غير مرغوبة على المنتج.

قسم العلاقات العامة وظيفته إنه يعمل علاقات مع الصحف ، ينشر المنتج بين الجمهور ، يبني علاقات مع المجتمع المحلى ، يحاول يدخل في الأجهزة الحكومية والقانونية عشان يكسب تأييدهم ويأثر على قراراتهم ، يحافظ على العلاقات مع المساهمين حاملى الأسهم والمجتمع المالي بشكل عام اللى مأثر على نشاط المنظمة ، وكمان مينسوش العلاقات مع المنظمات الخيرية والتطوعية ، اللى ممكن يبقوا سند للمنظمة بعد كده (عشان أنتوا عارفين الزنقة وحشة خصوصاً وسط الأزمات المالية الجديدة).

قبل مانتكلم عن الأشكال اللى بيتم بيها الشكل ده من الدعاية ، هنفتكر ازاى ان التسويق مكنش لمنتجات وخدمات بس ، لكن قلنا التسويق بيبقى لأشخاص ، منظمات تطوعية ، وأفكار ، وبلاد ، وأماكن ، وغيرها من الأشكال اللى احنا عاوزين نسوق لها.

أهو هنا بقى جه وقت الكلام عن كل الأشكال دى ، وهى دى مهمة العلاقات العامة ، لأن مش من المعقول ، لو أنا عاوز اسوق لنفسي كدكتور ، اعمل اعلان بعد المسلسل العربى ، يظهر لي وأنا بكشف على المرضى ، وبقول أنا الكشف عندى بكام ، ولو إن بيحصل حاجات كتير دلوقتى شبه كده ، لكنها فى الآخر فلوس فى الهوا.

وبمناسبة الفلوس اللى فى الهوا، فالرأي الجديد لناس كتير ، وأنا مع الرأى ده بشده ، إن ميزانية التسويق مبقتش قضية ، القضية كلها ، ازاى استغل الميزانية دى.

مش كده وبس ، المفاجأة إنى ممكن أعمل حملة تسويق ناجحة جداً من غير مصاريف إعلان ، ولو مش مصدقين ، اسالوا (Amazon) هما صرفوا كام على الإعلانات لحد دلوقتى.

المفاجأة الأكبر اللى بيقولها خبراء التسويق دلوقتى ، إن الإعلان ضعيف جداً فى بناء اسم وعلامة للمنتج ، و إن المسئول عن كده هى العلاقات العامة، وإن العلاقات العامة هى المسمار ، والإعلان هو الشاكوش اللى بيثبت بس المسمار ، يعنى إسطورة إن الدعاية هى الإعلان ، انسحبت فى خجل ، وحل مكانها ، “العلاقات العامة أولاً ، الإعلان ثانياً”.

فى نقطة مهمة جداً جه وقتها عشان تتقال هنا ، لمّا قولنا إن بقى فيه أنواع كتيرة فى الدعاية والتسويق مش عارفين نحطها فين ، واللى منها التسويق بالمديح (Word-of-Mouth Marketing)، واللى من أشكاله التسويق بلفت الانتباه (Buzz Marketing)، أعتقد إن ده وقته ، عشان نقول إنه عنصر ومهم وفعّال وشكل من أشكال التسويق والدعاية بالعلاقات العامة.

برضه مهم نقول إن مش معنى كلامى إن احنا نعتمد على عنصر واحد من المزيج الترويجى ، ونسيب باقي العناصر ، يبقى كده أنا بأخلّ بنظام نظام التواصل التسويقي المتكامل (Integrated Marketing Communication (IMC))، اللى بيهدف إنه يحيط العميل من كل ناحية بالرسالة التسويقية ، وبشكل متكامل ومترابط ، عشان يثبّتها فى عقله الواعى والباطن.

معنى كلامى إن احنا لازم نفهم إننا فى ظل وقت صعب ، مليان مخاطر وأزمات اقتصادية ، والموارد نادرة ، ولازم نبقى واعيين واحنا بنتصرف فيها ، وعشان كده لمّا ألاقى أسلوب جديد ومبدع ، زى التسويق بالعلاقات العامة ، وأفضل مركز على الإعلانات اللى بتاخد من الميزانية – المحدودة أصلا – ملايين ، يبقى مرجعش أشتكى من قلة الموارد ، وخلل الميزانية ، (وأستاهل اللى يجرالى من الآخر).

أشكال الدعاية الجديدة دى ، كتيرة جداً ومستحيل نحصرها فى شوية نقاط ، بس ممكن نتكلم فى أهم الأشكال، واللى منها:

– الأخبار (News): بكل أشكالها وأنواعها ، سواء فى التلفزيون ، على النت ، فى الجرايد ، المهم أنى لازم أوجه الأخبار عشان يشيدوا بمنتجي قدام الناس.

– الأحاديث (Speeches): سواء الصحفية أو الإذاعية ، واللى ممكن أخلقها أنا أصلاً لمّا أعمل حدث غريب ، وأجيب ناس تصور فى التلفزيون، وناس تكتب في الجرايد، وطبعاً لازم ياخدوا رأى ، وأكيد كلامى هيطلع فى الأحداث ، (وطبعاً عامل نفسى مش واخد بالى ، واتفاجأت !!).

– الأحداث الخاصة (Special events): اللى هى لا مكلفة ولا أى حاجة بس بتشد الناس ليّا ، زى المؤتمرات (news conferences)، حفلة بالألعاب النارية ، افتتاح ضخم ، تقديم وعروض للمنتج فى وسائل الإعلام (multimedia presentations)، … أو حتى عرض بالونات يشّد الناس ليه.

– المواد المكتوبة (Written materials): زى جريدة خاصة بالشركة ، رسايل مستمرة بجديد الشركة (Newsletters)، مقالات ، مجلات، تقارير سنوية عن الشركة وأحوالها ، الأوراق الدعائية (Brochures).

– المواد المرئية والمسموعة (Audiovisual materials): زى CDs ، DVDs، وفيديوهات أون لاين تتعرض على موقع الشركة أو عن طريق أى وسيط تانى.

– المواد اللى بتعرض هوية الشركة (Corporate identity materials): ممكن يبقى الزى الموحد (Uniforms)، الكروت (Business cards)، مبانى الشركة، عربيات واتوبيسات الشركة ، بس أهم حاجة تبقى الأدوات دى فعلاً مميزة جداً وتقدر تشّد الجمهور.

– التبرعات (Public service activities): المستمرة والمشاركة فى الأعمال الخيرية.

استغلال التسويق بالمديح ، واللى هو الكلام الكتير عن المنتج ، عن طريق فكرة المجتمعات والشبكات الاجتماعية (Social networks)، وده موضوع كبير ومتشابك ، بس ببساطة هو أني أسوق المنتج الشبابى فى أماكن تجمع الشباب زى النوادى والقهاوى ، والمنتج الأطفالى في المدارس وقنوات الأطفال ، وهكذا ، والفكرة الأساسية فيها نفسية ، من خلال تأثير أعضاء المجتمع على بعضهم.

– تسويق الرحلات المتنقلة (Mobile tour marketing): اللى من خلالها المنتج بيفضل يتنقل من مكان لمكان ، والجمهور يبدأ يشوفه على أرض الواقع قدامه ، مش مجرد صور فى التلفزيون والمجلات.

– المواقع الالكترونية (Web sites): هي من أهم وأقوى الأدوات في ايد المسوق بالعلاقات العامة ، لأنه مكان حر يقدر يحّط فيه كل أفكاره ، ولأنه كمان بيحول المنتج من مجرد سلعة أو خدمة لتجربة كاملة ، والناس بتدخل الويب سايت مش بس عشان تشترى المنتج ، عشان كمان الاستمتاع والترفيه.

العلاقات العامة هى كلمة السر فى التسويق النهاردة ، وهو موضوع طويل ، وقمة فى الجمال والابداع ، وعلى الرغم من كده .. تحذير شديد اللهجة لكل من تسوّل له نفسه يستخدم النوع ده من الدعاية … لو متعملش صح وبفن.. قول على منتجك السلام.