-->

Principles of Marketing

دخول التسويق بدون فهم لأساسياته وأدواته من الحاجات اللى ممكن تدمّر إمكانيات التسويق الحقيقية، كمان الإصرار على حل مشاكل الDigital Marketing بدون الاستعانة بادوات التسويق المختلفة والمتنوعة هو من أسباب فشل استراتيجيات السوشيال ميديا او الإعلان اونلاين، انت ممكن تحاول تحل مشكلة اعلان على فيسبوك عن طريق تغيير الtargeting لكن المشكلة ممكن تطلع في حاجة تانية زي بحث السوق او الاستراتيجية او البراندينج او التسعير او غيره من أدوات ومتغيرات التسويق، و عشان كده الكورس ده هدفه يبني عندك اساسات التسويق بشكل علمي، ويديك أدوات اكتر لحل مشاكل المنتجات و الترويج ليها سواء اونلاين او اوفلاين، ويكون أساس لأي حد مبتدئ او حابب يتعرف ويدخل مجال التسويق بشكل عام.

ايه ميزة الكورس ده؟


بنقدم الكورس بشكل مكثف وعلمي، مع تطبيق عملي بتطوير Marketing Plan، بحيث تفهم وتقدر تطبق التسويق بشكل متكامل، وتمتلك أدوات اكتر تساعدك في الشغل اونلاين أو أوفلاين.

محتوى الكورس


1. مقدمة وشرح العملية التسويقية – Marketing Process: مقدمة عن التسويق واساسياته، مع شرح للMarketing Plan، وامثلة وتطبيق عملي عليها.

2. البحث التسويقي – Market Research: استراتيجيات وأدوات البحث التسويقي – Marketing Research، وازاي تستخدمه في عمل Market Research متكامل.

3. الاستراتيجية التسويقية – Marketing Strategy: شرح لنموذج STDP بشكل تفصيلي ومتكامل، وازاي بتستخدمه الشركات للوصول لجملة الInternal Positioning.

4. المزيج التسويقي – Marketing Program/ Mix: المنتج – التسعير – التوزيع – الترويج والاعلان (وشرح المزيج التسويقي في حالة الخدمات – Services Marketing).

أهداف الكورس؟


بعد الكورس المفروض تكون فاهم اساسيات التسويق ومبادئ المجال بشكل عام، وتبقى بتقدر تعمل Marketing Plan متكاملة. فهم الأساسيات هيفيدك لو انت بتبدأ في مجال التسويق لأنك هتدخل المجال بثقة اكبر وبفهم اكتر لكل تفاصيله وجزئياته. لو انت متخصص ديجيتال ماركتينج فتقدر تدخله وانت فاهم التسويق وده هيساعدك تأسس استراتيجية مظبوطة وهيكون معاك أدوات اكتر عشان تحل مشاكل التسويق والاعلان اونلاين. وميزة انك بتعرف تعمل خطة تسويق متكاملة ده هيساعدك مع العملاء اللى هتشتغل ليهم تسويق، او الشركات التي بتقدم فيها وعاوز توريهم شيء عملي على انه فاهم التسويق بشكل متكامل.

محتوى الكورس بالتفصيل


1- مقدمة عن التسويق وأساسياته - Introduction:

في الجزء ده بتتعرف على التسويق بشكل عام، ومراحله (الMarketing Process)، واهم مصطلحاته، والفروق ما بينهم، فمثلاً فهم حاجة زي المزيج التسويقي – Marketing Mix وليه اتسمى بالاسم ده ضروري عشان تقدر تستخدمه بأفضل شكل ممكن في خطتك واستراتيجيتك التسويقية.


2- الخطة التسويقية – Marketing Plan:

بعد المقدمة عن التسويق، بتبدأ تعرف مكونات خطة التسويق، وامثلة ونماذج عملية عليها، وتبدأ تطور خطتك التسويقية بشكل عملي في الكورس، وفي كل session بتتعرف فيها على جزء جديد من التسويق بتضيف الجزء ده على خطتك لحد ماتشوفها بشكلها المتكامل بنهاية أيام الكورس.


3- بحث السوق – Market Research:

في الجزء ده بيتم شرح جزء مهم من التسويق وهو ازاي تعمل بحث متكامل على السوق، مع شرح لأساليب وطرق البحوث التسويقية – Marketing Research، زي الSurveys، وادواتها كطريقة تصميم الQuestionnaire.

بحث السوق من الأجزاء التسويقية المهمة جداً التي لو اتعملت غلط هتسبب استراتيجية تسويقية غلط، وبالتالي تضييع فلوس ومجهود في أدوات تسويقية مبتحققش الأهداف المطلوبة.


4- الاستراتيجية التسويقية – Marketing Strategy:

في الجزء ده بتتعلم ازاي تعمل استراتيجية تسويقية بناء على بحث السوق اللى اتعمل في الخطوة اللى قبل دي، بتتعرف على الطرق اللي بتستخدمها الشركات لتقسيم السوق، وازاي تستهدف الشريحة المربحة، وازاي تستخرج المزايا التنافسية في خطوة الDifferentiation، واخيراً ازاي تبني موقع ذهني قوي – Positioning. اذا كانت الاستراتيجية هي اكتر جزء مهم وعبقري في التسويق، فبناء موقع التنافسي في اذهان عملاءك هو الأهم جوه الاستراتيجية وهو اللى هيخليك تفهم براندينج وتبني أي براند بشكل مظبوط.

5- البرامج التسويقية/ المزيج التسويقي – Marketing Mix:

الجزء ده بيوريك عناصر التسويق الأساسية اللى محتاج تعرفهم وتتقن استخدمها بشكل متكامل، عشان توصل لافضل أداء للتسويق، هتعرف ازاي اكتر عن المنتج والتسعير والتوزيع والترويج والاعلان، وهتتعرف على المزيج التسويقي اللى بتزيد عناصره في حالة الخدمة.

بعد الجزء ده المفروض تكون قادر تحط استراتيجية لتصميم المنتج، وتسعيره، وتوزيعه، وعمل مزيج متكامل من الاتصالات التسويقية – IMC، مع توضيح لجزئيات زي وضع ال Budget التسويقية وازاي تعمل Control على الخطة، وتكملة ده بإكمال ومراجعة الMarketing Plan كتدريب عملي على اللي اتعلمته في الكورس.

مين المحاضر


المحاضر في الكورس هو حسام حسّان، صاحب موقع التسويق اليوم، وصاحب شركة ڤيركسام للتسويق، وصاحب 6 كتب في التسويق من ضمنهم الماركتينج بالمصري، ماركتينج من الآخر، والبيع الصعب، مع خبرة تسويق عملية في مصر، السعودية، الامارات، العراق، قطر، عمان، وفي مجالات من ضمنها الIT، العقارات، القطاع الطبي، المنتجات الاستهلاكية والتجزئة، المجالات الخدمية، ومجالات الB2B. اعرف اكتر عن المحاضر 

مين اللى هيستفيد من الكورس ده؟


1- أي حد عاوز يدخل مجال التسويق، او مبتدئ فيه، لان الكورس ده هيكون بداية ممتازة عشان يفهم اكتر عن المجال وتفاصيله، وترتيب ادواره ومجالاته الممكنة للشغل، وهيقدر يساعده يقرر ويحدد ايه الجزء اللى يقدر يتخصص فيه. الكورس ده بيوفر وقت كبير ليك لو انت في بداية كاريير تسويق، لانه هيحطك على بداية الطريق الصح لدخول التسويق.

2- أي حد عاوز يشتغل في الديجتال ماركتينج، وده لان اغلب اللى بيدخلوا مجال الديجيتال والاونلاين ماركتينج مبيكنش عندهم خلفية عن التسويق واساسياته، وده السبب اللى بيخليهم يعطلوا قدام أي مشكلة، كمان التأسيس الصح في المجال هيخليك تشوف التسويق بنظرة شاملة متكاملة، وهتديك دايماَ افضلية قدام المنافسين، لما بتقدر تقدم value إضافية في شكل حلول او خطط تسويق لعميلك او الشركة اللى بتشتغل معاها أو فيها تسويق.

3- الكورس هيكون مفيد لاي حد عنده بيزنس او ستارت آب، لكن لو وقته ضيق فممكن يدخل علطول في الكورس المخصص للبيزنس – Marketing for Startups، وان كان الكورس ده ممكن يكون تقديم مهم لكورس اكتر كثافة وهو كورس التسويق للستارت آب.

4- الكورس ده هيكون بداية كويسة لو عاوز تشتغل في التسويق بشكل عام في الشركات، مش بس الديجيتال ماركتينج، وحتى لو الدور ده يبان انه اقل من زمان، ودي حقيقة، لكن مازال موجود، ففي شركات كتير مازالت مقتنعة بالترويج الاوفلاين، كمان حاجات زي بحوث السوق والاستراتيجية التسويقية هي أدوار مهمة الشركات بتحتاج ليها متخصصين، وعموماً مديرين التسويق لازم يكونوا فاهمين وبيشتغلوا بكل طرق التسويق واستراتيجياته، وبالتالي الكورس ده مهم كبداية لو طموحك تشتغل في التسويق (التقليدي او الاوفلاين) وان كانت التسمية دي غير صحيحة ولكنها دارجة في السوق حالياَ!

هل هتعلم ديجتال ماركتينج في الكورس ده؟


الكورس ده مش ديجيتال ماركتينج، لكنه بيوريك التسويق واساسياته بشكل شامل ومتكامل، وبالتالي لو انت شغال اصلاً ديجتال ماركتينج فالكورس هيكون مفيد جداً عشان تشوف التسويق وحلوله وشموليته، ولو انت عاوز تشتغل في الديجيتال ماركتينج فالكورس ده هيكون ممتاز كبداية دخول له.


هل مفيش كورس ديجيتال ماركتينج متخصص بنعمله؟


حالياً لا، لكن الكورس المخصص للبيزنس والشركات الناشئة بيكون فيه جزء كبير للترويج اونلاين وفهم انجح استراتيجيات الترويج والاعلان على فيسبوك وانستجرام، وكل حاجة فيه بيتفيدك كديجيتال ماركتير، زي مثلاً كتابة المحتوى الإعلاني، و البراندينج.


لو انا دارس تسويق قبل كده، الكورس ده هيضيف لي جديد؟


لو انت درست تسويق قبل كده في الجامعة مثلاً او في كورس، فممكن يكون الكورس ده بدائي شوية بالنسبة لك، لكن احياناً بتكون محتاج ترجع تاني للاساسيات وتفتكرها لان معظم الحلول اللى محتاجها بتكون فيها! كمان ميزة الكورس ده انك بتاخد المعلومات من خبرات المحاضر العملية في السوق، بتحاول تطبق عملي وبتعمل خطة تسويق، وبالتالي بتاخد معلومات ممكن يكون جزء منها انت عارفه، لكن بتشوفها بشكل مختلف وجديد وبتطبقها فبتساعدك في شغلك.

هل هنطبّق عملي اللى بنتعلمه في الكورس؟


اغلب اللي بيحضر الكورس ده بيدور على الأساسيات لانه بيدخل المجال جديد او شغال ديجيتال ماركتينج وعاوز يتأسس صح في التسويق، بالتالي الكورس ده اغلب وقته هيروح في الشرح لاساسيات التسويق وازاي تعمل خطة تسويق، وهتقدر تطبق عملي على خطة تسويق واقعية او رمزية، وهتشوف امثلة ونماذج عملية من خبرة المحاضر في السوق، لكن لو انت معاك منتج او خدمة وبتدور اكتر على التطبيق العملي وقت الكورس فهيكون الأنسب لك كورس Marketing for Startups، لان ميزته الأساسية هي التطبيق العملي على كل حاجة بتاخدها في الكورس.

ايه الماتيريال اللى باخدها في الكورس؟


- بيكون متاح Exercises File فيكون فيه Template جاهزة لخطة التسويق، كل مرة بتضيف ليها جزء بتتعلمه وبنهاية الكورس بتكون عملت خطة تسويق متكاملة. (بتكون مطبوعة وفي نسخة منها Soft)

- كتب المحاضر بتكون مصدر مهم ترجعله، وده ميزة كبيرة ان في تنسيق بين كتب المحاضر وشرحه والتطبيقات العملية.

- بيتبعتلك كل العروض التقديمية – PPTs اللي بتحصل اثناء الشرح في ملف PDF

- كل النماذج التسويقية – Sample/ Models - زي نماذج خطط التسويق - بتتبعتلك عشان تقدر ترجعلها وتطبق عملي بمساعدتها.

- في تسجيل صوتي للشرح تقدر ترجعله عشان لو نسيت أي جزء اثناء شرحه، او مقدرتش تيجي في يوم.

- بيتم مشاركة التمارين العملية للمتدربين مع بعضهم عن طريق Google Drive بحيث يتم الاستفادة من تعدد التمارين ووجهات النظر والخطط التسويقية العملية.

فترة وعدد ساعات الكورس


الكورس بيكون كل سبت من 4 ل 8 لمدة 16 ساعة (4 مرات في شهر)

استثمار الكورس


1600 جنيه

* تقدر تعرف اقرب معاد للكورس الجديد، والخصم المتاح حالياً على سعر الكورس، وتحجز مكانك من خلال الفورم دي

ليست هناك تعليقات:

إرسال تعليق