الاستراتيجية والتخطيط
استراتيجيات التسعير:
لو أنا شركة عندى كذا منتج، هيبقى عندى كذا استراتيجية ممكن اتباعها فى التسعير:
- تسعير خط الإنتاج : لو الشركة عندها خط إنتاج كامل ، تقدر تحط سعر مختلف لكل منتج على خط الإنتاج ، والفرق ما بين سعر المنتجات على خط الانتاج الواحد هو إشارة للفرق في الجودة ما بين المنتجات.
- تسعير المنتجات الاختيارية : لو الشركة عندها منتج ممكن يتباع معاه منتجات تانية زى تكملة ، أو “اكسسورى” ، ومثال على النوع ده من المنتجات ، عربية ليها سعر من غير أى كماليات ، هيزيد سعرها كل ما نزود الامكانيات اللى فيها ، فالعربية اللى من غير اى كماليات ليها سعر ، والعربية اللى معاها تكييف وباور وسنتر لوك بيزيد سعرها.
- تسعير المنتجات اللازمة لتشغيل المنتج الأساسى : في شركات قايمة على فكرة ان عندها منتج مينفعش يشتغل من غير منتج تانى ، فى الحالة دى الشركة بتقلل سعر المنتج الرئيسي وتزود من سعر المنتج التكميلى اللازم عشان المنتج الرئيسي يشتغل. مثال على كده ، شركة (HP) بتنزل الطابعة بأسعار قليلة نسبياً ، مع رفع سعر الحبر اللى لازم عشان الطابعة تشتغل.
- تسعير المنتجات العالقة : ساعات بيبقى فيه منتجات عالقة مع المنتج الرئيسى ، أغلب الشركات والمنظمات بتشوف ان المنتج ده عديم الفائدة وبتتخلص منه ، وطبعاً فى أغلب الأوقات بيحصل الكلام ده بشكل مكلف على الشركة نفسها ومكلف على البيئة والمجتمع. الحل بقى عند الشركات الواعية الكبيرة أنها بتتخلص من المنتجات العالقة بطريقة أذكى ، وبتحقق من وراه ربح كمان. الشركات دى بتسعر المنتج بأقل الأسعار وتبيعه للشركات والجهات اللى ممكن تستفيد منه ، وأوضح مثال للموضوع ده ، هو أن حدائق الحيوان بدل أنها تتخلص من روث الحيوانات بشكل يؤذي البيئة ، بتاخد المنتج وبتبيعه كسماد للمزارعين بأقل الأسعار.
- تسعير المنتجات القابلة للتشكيل في مجموعات متجانسة أو على شكل “باقة” من المنتجات : فى شركات عندها مجموعات وتشكيلات من المنتجات، وأشهر الشركات والمنظمات دى ممكن نقول المطاعم ، اللى بتعمل عروض لمجموعة من المنتجات دى ، بسعر مناسب أو أقل من سعر كل منتج على حدة ، ودى زى كلمة “الكومبو” الشهيرة اللى بنسمعها فى محلات الأكل الشهيرة زي (ماكدونالدز) ، وطبعاً بيدخل فى النوع ده من التسعير الايحاء الى حد ما لما نعرف ان مش شرط سعر تجميعة المنتجات بيبقى مناسب أو أقل من سعر كل منتج على حدة.
شكرا